Jimco, January 10, 2025 (HOL) – Waraabe dad cun ah ayaa laba wiil ku dhaawacay deegaanka Dhagaxyo Caddo oo ka tirsan degmada Gaashaamo ee Ismaamulka Soomaalida Itoobiya.
Waraabaha ayaa dhaawacyo u gaystay wiil 16 jir ah oo lagu magacaabo Bashiir Maxamed Ismaaciil Xariir iyo wiil 14 jir ah oo isna lagu magacaabo Rooble Maxamed Xuseen, sida ay qaar kamid ah waalidiinta wiilashu u sheegeen HOL.
"Isaga oo inanku xerada geela hor hurda ayuu cunay, oo afka ayu afka u galiyay, hadana gacanta ayuu qabtay, imika waxa lagu dabiibayaa Isbitaalka magaalada Burco" Maxamed Ismaciil Xariir oo ah aabaha wiilka 16 jir ah ayaa sida yidhi.
Wiilka 14 jir ka ah oo isna lagu dabiibayo isbitaal ku yaala Gaashaamo, ayuu waraabuhu soo weeraray isaga oo adhi ilaalinaya goor barqo ah, kadibna waxa uu qabtay gacan, isaga oo dhaawac u gaystay, kadibna walaashii ka yar oo la joogtay ayaa waraabaha gudun ku dhufatay oo ka riday.
Waraabahan ayaa galabta laga helay isaga oo ku jira meel kayn ah kadibna waala dilay sida ay xaqiijiyeen qaar kamid ah dadka deegaanka, oo isku hawlay in ay ka hor tagaan in aanu dad kale cunin.