Sabti, October, 19, 2024 (HOL) - Wasiirka arrimaha dibadda Masar, Badar Abdelatty, ayaa shaaca ka qaaday in ciidamada Masar ay dhawaan u soo diri doonaan Soomaaliya.
Wareysi uu siiyay AlQahera News ayuu Abdelatty ku sheegay in Masar ay weli ka go’an tahay inay Soomaaliya ka taageerto adkeynta ammaankeeda.
Tani waxay ku soo beegantay toddobaadyo uun ka dib markii Masar, Soomaaliya, iyo Ereteriya ay ku heshiiyeen hindise wada jir ah oo lagu dhisayo ciidan Soomaaliyeed oo tayo leh, si ay u difaacaan xudduudaha iyo dhulalka badda ee dalka.
"Masar waxa ay diyaar u tahay in ay bixiso gargaar kasta oo ay u baahan karaan dadka Soomaaliyeed," ayuu yiri Wasiirka, isagoo farta ku fiiqay dadaallada ciidan iyo iskaashigan sii kordhaya ee saddexda dal.
Arrintaan ayaa ku soo beegmaysa xilli Geeska Afrika ay ka jiraan xiisado ka taagan Soomaaliya, Badda Cas, iyo colaadaha gudaha ee Itoobiya.
Keenista ciidamada Masar waxay calaamad u noqon kartaa rabitaanka Masar ee ah inay ballaariso joogitaankeeda gobolka iyo ilaalinta danaheeda ku teedsan Wabiga Niil iyo Badda Cas.