Hiiraan Online

 

Arbaco, November, 13, 2024 (HOL) - Warar dheeraad ah ayaa kasoo baxaya qarax geystay khasaare isugu jira dhimasho iyo dhaawac oo Xalay ka dhacay degmada Deyniile ee magaalada Muqdisho.

Qaraxa oo ahaa miino nooca la dhigo wadada dhinaceeda ayaa lala eegtay gaari Cabdi bile ah oo ay saarnayeen ciidano ka tirsan kuwa dowladda Fedaraalka Soomaaliya.

Inta la xaqiijiyay ilaa sadax askari oo ka tirsan ciidanka Militariga Soomaaliya, gaar ahaan guutada 77-aad ee degan xerada Urur Howleed ee ku taala degmada Deyniile ayaa ku geeriyooday qaraxaan miino, waxaana sidoo kale ku dhaawacmay sadax askari oo kale.

Ma jirto illaa hada wax war ah oo ka soo baxay dhanka laamaha amaanka dowladda iyo maamulka degmada Dayniile oo ku aadan qaraxaan miino ee khasaaraha kala duwan geystay.

Ugu dambeyntii Kooxda Al-shabaab ayaa qaraxyada noocaan oo kale ah la beegsata marka ay wadooyinka ku socdaalayaan qeybaha kala duwan ee ciidanka iyo masuuliyiinta dowladda Fedaraalka Soomaaliya, hayeeshee qaraxyada noocaan ah ayaa yaraaday mudooyinkii dambe gudaha magaalada Muqdisho.