Hiiraan Online

 

Talaado, December 24, 2024 (HOL) - Xulka Qaranka 17 jirada Soomaaliya ayaa si rasmi ah uga soo haray galabta tartanka isreeb reebka AFCON U17 ee dalalka bariga iyo bartamaha Afrika, kadib markii galabta laga badiyay.

17 jirada Qaranka Soomaaliya ayaa galabta guuldaro kala kulmay dhigooda dalka Uganda oo ugu awood sheegtay Soomaaliya 4-1, waxaana ciyaartu aheyd kulan ka mid ah Sema finalka ama wareeega afar dhamaadka tartanka.

Ciyaaryahanada Soomaaliya oo kulamadii hore ee lasoo dhaafay soo muujiyay dadaal badan ayaa ugu dambeyn suurta galin waayay iney xajistaan guulahii ay horay usoo gaareen.

Si kastaba ha ahaatee Ciyaartoyda dalka Uganda oo ah sanadkaan marti galiyaasha koobkaan ayaa guul muhiim ah ka gaaray xulka 17 jirada Qaranka Soomaaliya oo difaacanaayay koobkaan.

Xulka Qaranka Uganda oo haatan iska xaadiriyay finalka tartankaan is reeb reebka AFCON U17 ee dalalka bariga iyo bartamaha Afrika ayaa loo badinaya in martigaliyaasha tartankaan ee Uganda in sanadkaan ay ku guuleysan doonaan koobkaan.