Wararka Maanta: Isniin, Dec 23, 2024-8 Askari oo katirsan ciidamada Kenya oo ku dhaawacmay qarax ka dhacay meel u dhow xadka Kenya iyo Soomaaliya

8 Askari oo katirsan ciidamada Kenya oo ku dhaawacmay qarax ka dhacay meel u dhow xadka Kenya iyo Soomaaliya

Isniin, December 23, 2024 (HOL) - Siddeed askari oo kamid ah ciidamada Kenya ayaa si xun loogu dhaawacay kadib markii gaari ay wateen ay kooxda Alshabaab qarax la beegsadeen.

Weerarkan ayaa ka dhacay deegaanka Khorof Haraar oo ka tirsan degmada Wajeer, una dhow xadka Kenya iyo Soomaaliya.

Dhacdadan ayaa ku soo beegantay xilli ay ciidamada Kenya wadeen rondo amni oo ka dhan ah dhaqdhaqaaqyada ay wadaan kooxda Al-Shabaab.

Gaariga qaraxa lala eegtay ayaa gabi ahaan ku burburay qaraxa. Askartii dhaawacantay ayaa si degdeg ah loogu daadgureeyay isbitaal ku dhowaa si xaaladdooda caafimaad loola tacaalo.

Laamaha ammaanka Kenya ayaa xoojiyey hawlgallada lagula dagaalamayo Alshabaab iyo kor u qaadista xasilloonida gobolka. Si kastaba ha ahaatee, weerarrada joogtada ah ayaa muujinaya caqabadda joogtada ah ee sugidda amniga xuduudka.

Hiiraan Online