12/26/2024
Today from Hiiraan Online:  _
Wararka Maanta- Isniin, Dec 23, 2024
Ciidanka Hay'adda Nabadsugida Jubbaland oo ku guuleystay fashilinta qarax miino
 

Isniin, December 23, 2024 (HOL) - Ciidanka hay'adda Nabad sugida iyo Sirdoonka maamulka Jubbaland ayaa Xalay ku guuleystay iney fashiliyaan miino nooca dhajiska ah oo la sheegay in kooxda Al-shabaab ay ku dhibaateyn rabtay dadka ku nool magaalada Kismaayo.

Qaraxaan miino ayay ciidamadu ku qabteen xaafada Farjano ee magaalada Kismaayo, kadib markii qof ka mid ah dadka ku nool xaafadaasi uu kusoo wargaliyay laamaha amaanka.

Ciidamada Nabad sugida Jubbaland ayaana ku guuleysatay iney goobga ka qaadaan miinada iyadoo aanan qarxin, waxayna uga baaqeen shacabka magaalada Kismaayo in sidaan oo kale ula soo wadaagaan xogta waxyaabaha ka dhanka ah amaanka.

"Ciidanka Hay'ada Nabad sugida iyo sirdoonka Jubbaland ayaa caawa ku guuleystey fashilinta miino nooca dhajiska ah oo ay khawaarijtu rabtey inay ku bartilmaameed-sadaan shacabka reer Kismaayo" ayaa lagu yiri qoraal kooban oo kasoo baxay maamulka Jubbaland.

Ugu dambeyntii magaalada Kismaayo ayaa aheyd mudooyinkii dambe meel ka nabdoon qaraxyada iyo weerarada kale oo ay geystaan kooxda Al-shabaab, kadib markii ciidamada amaanka magaaladaasi ay kordhiyeen howlgalada ay ku xaqiijinayaan amniga magaaladaas oo xarun ku meel gaar u ah maamulka Jubbaland.