Talaado, Juun, 27, 2023 (HOL) - Maamulka guud ee gaadiidka dalka Sacuudi Carabiya, ayaa sannadkan
markii ugu horreysay bilaabay tijaabada basaska korontada ku shaqeeya ee iskood
isu wata, si ay ugu adeegaan xujeyda.
Bas kastaa waxa uu leeyahay 11 kursi, waxa uu shaqeeyaa 6
saacadood khidmadiiba, waxaanu gaadhi karaa xawaare dhan 30 km/saacadiiba.
Basaska ayaa isticmaala artificial intelligence macmal ah,
kamaradaha, iyo dareemayaasha ku hareeraysan si ay u shaqeeyaan iyada oo aan qofna
faragelin. Waxay ururiyaan macluumaadka inta lagu jiro dhaqdhaqaaqa oo ay u
falanqeeyaan si ay u gaaraan go'aamada lagama maarmaanka ah si loo hubiyo amniga rakaabka.
Adeegga ayaa ujeedadiisu tahay in la fududeeyo qaadista
xujeyda iyo in la qiimeeyo suurtagalnimada isticmaalka teknoolojiyaddan inta
lagu guda jiro Xajka. Sacuudiga ayaa higsanaya in la dejiyo shuruudaha lagama
maarmaanka u ah hawlgalkooda ganacsi sannadaha soo socda.
Sanadkan xajka waxaa yimid xujeydii ugu badneyd muddo saddex
sano ah, kaddib xayiraadii COVID-19 oo si weyn hoos ugu dhigay tirada xujeyda, mid
ka mid ah shanta tiir ee Islaamka.
In ka badan laba milyan oo xujey ah oo ka kala socda 160
waddan oo caalamka ah ayaa toddobaadkan ku kulmay masjidka barakeysan ee
Islaamka ee Makka si ay u billaabaan socdaalkooda ruuxiga ah ee cibaadada ee
goobaha barakeysan ee ku yaalla magaalada barakeysan iyo nawaaxigeeda.
Mas’uuliyiin ka kala socda dhowr waddan oo Islaam ah ayaa
xaqiijiyay in dib loo soo celiyay qoondada Xajka ee sanadkan oo la mid ah sidii
ay ahayd ka hor inta uusan dillaacin cudurka faafa ee coronavirus. Sidaas
darteed, tirada xujeyda dibadda ka imaanaya ee sanadkan gudaneysa waajibaadka
xajka ayaa kor u dhaafi doona labo milyan oo ka kala imaanaya 57 dal oo Islaam
ah iyo in ka badan 100 dal oo kale oo ay ku nool yihiin Muslimiin ku kala nool
daafaha caalamka.
Wasiir ku-xigeenka Xajka iyo Cumrada Dr. Abdel-Fattah Mashat,
ayaa sheegay in wasaaraddu ay raacayso isla habkii lagu dhaqmi jiray ka hor
inta uusan dillaacin cudurka Coronavirus, si loo go’aamiyo qoondada xujeyda ee
dal kasta. Wuxuu carrabka ku adkeeyay in xilligan uu yahay mid gaar ah, isla
markaana ay diyaar u yihiin dhammaan adeegyadii laga fulin lahaa goobaha
barakeysan.
Mashat waxa uu sheegay in ay jiraan qorshayaal taxaddar leh
oo ay mas’uuliyiinta diyaariyeen oo ku aadan wax ka qabashada xaalad kasta oo
deg-deg ah oo caafimaad.
Sida lagu sheegay tirokoobyada ay soo saartay hay’adda guud
ee tirakoobka, tirada xujeyda gudaneysa xajka sanadka 1440 ayaa kor u dhaaftay
2.4 milyan. Isla markaana, tirada xujaayda gudaha dalka ku sugan ayaa lagu
qiyaasay ilaa 634,000 oo qof oo isugu jira rag iyo dumar, kuwaas oo ay ku
jiraan 211,000 Sucuudiyaan ah iyo 423,000 oo qurba-joog ah.
Hassan Istiila, Hiiraan Online
[email protected]