Maraakiibta Yurub oo si sharci darro ah uga kalluumeystay Badweynta Hindiya oo ay ku jirto Soomaaliya
Isniin, May, 30, 2022 (HOL) - Maraakiibta kalluumeysiga ee Yurub ayaa si sharci darro ah
uga jilaabtay kalluunka tunaha ee ku jira Badweynta Hindiya, sida lagu sheegay
baaritaan la sameeyay oo khubaradu ay falanqeeyeen.
Labo baaritaan ayaa lagu sameeyay kalluumeysiga Badweynta
Hindiya, mid waxaa sameysay kooxda OceanMind, halka mida kalena ay sameysay
hay'adda samafalka Blue Marine Foundation oo ay weheliso shirkadda Kroll.
Agaasimaha fulinta ee Blue Marine Foundation Charles Clover,
ayaa sheegay in caddeymaha iyo warbixinta ay muujinayaan in maraakiibka Midowga
Yurub ay kalluumeysiga sharci darrada ka sameyeen biyaha waddamada Soomaaliya,
India, Mozambique iyo dalalka kale ee ku teedsan xeebaha badweynta India.
Maraakiibta sameeyay kalluumeysiga sharci darrada ah ayaa ah
Seine (Waa nooc leh shabaagta waaweyn) ee ku sugan biyaha xeebaha badweynta
Hindiya, waxaana ay xaalufiyiin noocyada kalluunka sida skipjack, bieye iyo
yellowfin tuna.
Maraakiibta kalluumeysiga sameysay ayaan wax sharciyad ah u
heysan in ay ka kalluumeystaan biyaha xeebaha Badweynta Hindiya, sida ay sheegtay
hay’adda Blue Marine Foundation.
Hay’adda Blue Marine Foundation ayaa warbixinteeda ku
xustay in maraakiibta jilaabtay Tunada ee laga leeyahay dalka Spain ay ka
kalluumeysteen biyaha Soomaaliya intii u dhaxeysay sannadihii 2017-18 iyo dalka
Hindiya oo ay ka kalluumeystaan intii u dhaxeysay sannadihii 2018-19, balse dowladda
Spain wali kama aysan jawaabin eedaha loo jeediyay.
Warbixinta labaad ee hay’adda Blue Marine Foundation iyo shrikadda
Kroll, ayaa baartay xogta laga helay software-ka ilaalinta maraakiibta ee loo
yaqaan The automatic identification system (AIS), waxayna ogaadeen in
maraakiibta joogtay gobolka qaarkood ay damiyeen aaladaasi, taas oo noqon karta
calaamad muujinaysa kalluumeysiga aan loo heysan fasaxa ama sharci darrada
ah.
Cadaadis xooggan ayaa lagu haya kalluunka Tuunada, iyadoo ay
sii kordhayaan maraakiibka kalluumeysiga warshadeysan ee xaalufinta ku haya
kalluunka Tunada, taas oo horseedi karta in kalluunka Tunada uu dabar go’, saynisyahannadu
ayaa arrintaaso ka digay.
Hay’adda Europêche oo
iska fogeysay eedaha kalluumeysiga sharci darrada.
Europêche ayaa ah wakiilka kalluumaysatada Midowga Yurub. Waxaana
ay wakiil ka tahay ilaa 45,000 oo markab ah, 80,000 oo kalluumaysato ah oo ay xubno
ka yihiin 16 urur oo ka kala socda 10 wadan oo Yurub ah.
Xeel-dheerayaasha iyo dadka xog-ogaalka u ah arrimaha
shatiyada ayaa xaqiijiyay in maraakiibta Midowga Yurub aysan wax shati ah u
haysan inay ka kalluumeystaan biyaha Soomaaliya tan iyo 2013.
Hay’adda Blue Marine Foundation ayaa dhinaca kale sheegtay
in mas’uuliyiinta dalka India ay sidoo kale xaqiijiyeen in aysan wax ruqsad ah
siinin maraakiibta Midowga Yurub.
Europeche ayaa ku andacooneysa in aysan jirin wax kalluumaysi
ah oo maraakiibta Midowga Yurub ay ka sameyaan biyo xeebeetyada dowladdaha
iyagoo aan heysan wax shati ah, balse hay’addaha warbixinta soo saaray ayaa Europeche
ka codsaday in ay keenaan heshiis kalluumeysi oo ay la galeen dowladdaha
Soomaaliya iyo India.
Waxaa xooggan caddaymo muujinaya in qaar ka mid ah
maraakiibtaas ay ka kalluumaystaan biyaha xeebaha Indian Ocean iyaga oo aan
haysan wax oggolaansho ah.
Hassan Istiila, Hiiraan Online
[email protected]
